«Болашақ» бағдарламасы бойынша 700 шәкіртақы бөлінді
Биылғы жылы «Болашақ» бағдарламасы бойынша 700 шәкіртақы бөлінді, яғни өткен жылғымен салыстырғанда 100 стипендияға артық. Бұл жайлы Халықаралық бағдарламалар орталығының президенті Ғани Нығметов мәлімдеді. Ендігі кезекте шәкіртақыдан үмiткерлерден талап етілетін құжат - академиялық оқуға өз бетiнше түсуге ниетті немесе «Болашақ» шеңберiнде тәжірибеден өткісі келгендердің шетелдік оқу орнынан шақырту қағазы болуы тиіс. Сондай-ақ, осы жылдан бастап, үмiткерлердің кем дегенде екi жыл жұмыс өтiлi және зейнетақы жарнасының төленгенін растайтын құжат болуы шарт. 2016 жылдың үміткерлерінің құжаттарын қабылдау процесі 11-сәуірден басталмақ. Ал, 2017 жылдың қаңтарынан бастап «Болашақ» ережелеріне өзгерістер енгізілетін болады. Инженерлік-техникалық мамандарға жаңа магистратура ашылады және «Болашаққа» түсу талаптары күшейтіледі.